طراطير طراطير طراطير
للشاعر والأديب بسيوني صديق
*************************
طراطير طراطير طراطير
إحنا بقينا في زمن الفرافير
عيال مش عاوزة تتعب
عاوزة بس تطير
طب يا بني روح اشتغل
يقولك أبويا عنده كتير
قاعد وراكن ع الرف
مستني الطوابير
**************************
طراطير طراطير طراطير
والتاني سرحان ف التوهان
قاعد خنزير
نايم أو صاحي بيحلم
فاكر نفسه دكتور ولا مدير
ماحدش هيشتغل
الحكومة عاوزة شوية تطهير
إللي فيها مكفيها
أصغر ما فيها كبير
**************************
طراطير طراطير طراطير
واحد قرب يطلع ع المعاش
ويقعد جنب العصافير
وزميله التاني مات
و ارتاح من المشاوير
وإللي عايش وبعافية شوية
جاتله البواسير
**************************
طراطير طراطير طراطير
أما عمك دعبس من طبطه
بيقولوا عليه سكير
راجل في حاله
بيروح المولد ويبيع زمامير
الناس مش سايبه حد في حاله
ولا صغير ولاكبير
آه فين أيام زمان
أيام الحمص والحلاوة والفطير
كانت أيام حلوه مفيهاش هم
ولا غم ولا كلام زي السم
كلام ناعم خفيف ع القلب زي الحرير
**************************
طراطير طراطير طراطير
ياريت تتعلملك صنعة
وتبص لابوك وتغير
شوفت الواد ولعة
بقي ولعة وأسطي كبير
بعد ماكان بينضرب كل علقة وعلقة
بالشواكيش والمسامير
بقى راجل وزينة الرجالة
مش زيكم ياشوية صراصير
عنده محلات ومحلات
ماشاء الله عليه ف قرية أبو صوير
*************************
طراطير طراطير طراطير
لسه برضه بدور علي وظيفة
الله يرحم العاطشجي.والكلاف والغفير
كانوا مبسوطين راضيين بيعيشتهم
بحق الله العلي القدير
ولما تسال حد فيهم يقولك
أنا غني مش فقير
وهو ف بيته معندوش ولا حاجة
بس عنده قناعة وعنده الخير
***************************
طراطير طراطير طراطير
شوفلك بقي بلاص عسل
ولا قله تكسرها وري زيير
وتنسى كل اللي حصل
وتفكر في التغير
بلا وظيفة بلا كسل
ولا هترجع تغني وتقول طراطير
طراطير طراطير طراطير
إحنا بقينا في زمن الفرافير
*****************************
ليست هناك تعليقات:
إرسال تعليق