فانتازيا..مطلعها عن الفولكلور
بقلم..مرقص إقلاديوس
..........
على حسب وداد قلبى يابا.
حبيبى
يوم حلو،و يوم مر،
و أنا فى اليومين مغرم صبابا.
ما كدبوش
لما قالوا فى الغناوى،
العاشقين دايما،
يا عينى غلابة.
قلبى مخلص،
و حبيبى وفى،
لكن حوالينا،
غياريين كتير ديابة.
على حسب وداد قلبى ياما.
عشت بدماغى سنين،
لا يهمنى إجماع،
و لا لمة.
و ياما خاصمونى حبايبى،
و كانت فرقة،
من بعد ضمة.
اصل العقل بيشرد،
حتى عللى،
اتفق عليه الكل،
و حفظوه صما.
على حسب وداد قلبى يا عمى.
قلت اشاور اصحابى
فى حبى،
لما اتفقوا
على ألا يتفقوا،
رفعت لفوق عيونى،
قلت يا ربى.
عندك الرأى ،و الرأى عندك،
إنت العالم بحال،
عقلى و قلبى.
على حسب وداد قلبى يا خال.
ألهمنى ربى
فى لحظة غالية،
برأى تمام
و عال العال.
إنى أوفق بين
شوق قلبى و حسابات عقلى
فى كل حال.
من ساعتها فرحان،
شاكر لربى.
يا رب ديم عليا دى الحال.
ملاح بحور الحكمة
مرقص إقلاديوس
ليست هناك تعليقات:
إرسال تعليق