« هتيجي إمتى يا بكرة »
===============
هتيجي إمتى يا بكرة
ما زلت مستنيك
وعايش على أمل
أني ألتقي بيك
وبتحمل حاجات كتيرة
فيها الخفيفة وفيها التقيلة
وصابر لحد ما تفرج
في يوم واصحى ألاقيك
وباتجاهل أشياء وباتغاضى
عن أشياء علشان الدنيا
تمشي وتعدي واملي فيك
وده مش بالساهل ولا بالهين
ولكنه ممكن في يوم يفيد
باجي على نفسي كتير كتير
على أمل يكون فيه يوم تغيير
يبدد ظلام اليأس ويكبر ضوءالشمعة وتبقى نهار كبير
يطلع الضحكة المكتومة إللي مش
قادرة تطلع من زمن بعيد
ويرجع الأمل من تاني
بعد الإحباط ما بقى شديد
ويرجع معاه الموسيقى والأغاني
ونسمعها تاني من جديد
ويرجع للورد عبيره ويفتح من تاني
ويبقى زاهي سعيد
ما تقولي بقى يا بكرة هتيجي
علشان أفضل مستنيك
ولا أفقد الأمل
ومعنتش أفكر تاني فيك
ويا ترى لو جيت
هتبقى أحلى يا بكرة
وتحقق أملي فيك
ولا هتبقى زي اللي قبلك
واستنى من تاني
بكرة اللي جاي بعديك
حسني همام
ليست هناك تعليقات:
إرسال تعليق