مملكتي
تعالي صلي ع الهادي وسمعني
وهاحكيلك حكاية كلامها بوجعني
قالت لي زرعته ومن جدري بيقلعني
ما فيش فيها حاجة تعيبها
وكانت آية في شبابها
لكن خانها وكمان سابها
وطفل رضيع مغلبها
وفقر وجوع معذبها
**************
******
بتحكيلي وبتقولي
وعهد الله عشان إبني نسيت نفسي
ولولا الناس بتندهلني لتاه إسمي
وراحت ضحكتي والفرحة مع أمسي
*******************
********
وبالإصرار وطولة البال صبح قامة
ما بين الخلق سمعة وشارة وعلامة
مع كل خطوة دعوة برزق وسلامة
****************
********
وف ليلة لملم كل حاجة تخصها
وبنبرة المحزون تباكي وقال لها
مشغول أنا عنك
كبر كتير سنك
هسكنك يا أمه
ف دار تشيل همك
وكمان هناك لمة
قريبين منك
******************
********
مرت ثواني كما السنين
سألت وقالت هي مين
أنا يا ابني هتوديني فين
**********************
**********
أنفاسي مطبوعة علي الجدران هنا
حتي الدفا والبرد إحساسي أنا
اللقمة بالمسها بتنزل بالهنا
ياما دعيت لك لما ضهري يتحني
تبقي السند ليا وثمري اللي إتجني
**************************
*************
لو قلبي ممكن يتفتح
هتلاقي نفسك ف الوريد
والدم بتدفق شديد
والنبض علشانك بزيد
حساك يا عمري كما الوليد
حاسب لجلدك يتجرح
لو قلبي ممكن يتفتح
***********************
************
عايز تخرج روحي من جسمي
تجردني من الاحساس ومن إسمي
تخليني رقم مكتوب بدفترهم
وافوتك إنت وادعيلهم
تصدقني
خطايا علي الطريق يا ابني هتشفعلي
وهتقولك منين ما تروح هترجعلي
كتير كانت بتسمعلي
وأنا بعددها بادعيلك
يطول عمرك ويديلك
تصدقني
هيسأل عني ضوء الشمس ع الشباك
ومين هينشف الشرابات عليها هناك
ومين هيلمع الجزمة ف كل صباح
ومين هيفكرك بالساعة والمفتاح
ويدعيلك تعيش مرتاح
*********************
*********
بلاش يا ابني تبهدلني
ومن مملكتي تعزلني
طب إسأل كل شئ ف البيت
ما فيش مر يوم ما شقيت
وكل حاجاتك ألمسها
وأوطي عليها وأبوسها
وأرض البيت أنا كم مرة باكنسها
ولا مرة سمحت لحد دنسها
ومين يرقيك
ومين يسقيك
ومين يدعي الاله يشفيك
***************
********
نهاية القول
أنا باقية ف مملكتي
وكبر السن مشكلتي
وحكمي عليك ف محكامتي
هتنزعل ضيف
ولو كل اللي عندي رغيف
هقاسمك فيه بقلب نضيف
بقلمي
الشاعرة
ناهد الموجي
ليست هناك تعليقات:
إرسال تعليق