من يدور الوقت
ـــــــــــــــ د. صالح العطوان الحيالي -العراق
الوكت من يدور ما يدري شلون كان
الفرح شرد من عدنا ما ندري بيا مكان
صار الوكت بعد ما بي أمان
راحوا الطيبين وراح وياهم الحنان
لا صلة رحم لا حب لا حنان
راحت الغيرة على الكاع وعلى النسوان
وراح وياهن الطيب والإحسان
وصارت الدنيا كال فلان وفلان
وصارت العيشة ذل وخذلان
راحت العجايز وراحت الكعدة الحلوة
وخوطة الاستكان
وراح وياهن الحب والحنان
والوكت صار للكذاب وابو اللسان
والحجاية الزينة ما مرغوبة
والنصيحة صارت أثقل من الطابوكة
ليش دنيانا أصبحت مكلوبة
وحياتنا حزن أصبحت مكتوبة
من مشوا من عدنا أصحاب الضمير
راحوا أهل الخير ماضل عدنا خير
سكتت الشياب واليحجي الزغير
هاي بالله عليكم بأي وكت محسوبة
قبل بالديوان نتعلم كلام
اليجي مسير نستقبله بكل احترام
وهسة بس فيكات ما يرد السلام
والأفكار بهالوكت متعوبة
كانت من بعيد ربعك يغنولك
ويفرح قلبك لصاحبك من يجيك
وهسة كام من الشقا يزعل عليك
وتعتذرله تكله بس هالنوبة
بالمشاغل خلصت سنين العمر
نطلع من الصبح ونرد العصر
الجار ما يدري بجارة بياكتر
من التعب راحتنا مسلوبة
ليش دنيانا أصبحت مكلوبة
ليست هناك تعليقات:
إرسال تعليق