صرخه قوية.
عبدالله رجب ابوعدنان
يا منصبين نفسكو حراس
ع البلد ديه
ارحمو وجع الناس
ارحمونا شويه
ياما قولنا واشتكينا
والصرخة قويه
دموعنا ف عنينا
طرحت مودة وحنيه
لو كان بادينا
كنا خلصنا م المطبلاتيه
بالرخيص بعتونا
وف عز فرحنا جرحتونا
خلاص كفاية كده وسيبونا
إحنا وهيا
دي حياتنا وراضيين بيها
وروحنا راح نفديها
ودوانا الصبر يا صنايعية
روحت لطبيب جراح
يمكن م الوجع ارتاح
طلبت من اللايمين السماح
الطبيب ما لقي دوا ليا
زرعتو القسوة من سنين
ودمع طفل مسكين
وغلابة ع الرصيف نايمين
والفرجة بقت عاديه
يارب ف العلا ارحم حالي
بعد ما اتنكرو وبعدو خلاني
الضحكه غابت عن زماني
وحبل المودة ازاي يتوصل من تاني
وباين يا صاحبي خسرنا القضيه
اضحك كركر ع الوجع
م الهم ياما قلب اتخلع
والحزن مالو مرتجع
ومين راح يسمع
حزينة هيا الاغنيه
عدل مكسوف ف بلدنا
رجله مكسورة زي كل ولادنا
الفرحة غابت عن أعيادنا
والصحبية بقت أذيه
صرخه قوية.
عبدالله رجب ابوعدنان
شاعر الغلابة
ليست هناك تعليقات:
إرسال تعليق