صبية بالف راجل / بقلم الأديب محمد صادق ندا

صبية بالف راجل
..............
بحر الحياة
امواجه عالية
من غير شطوط
والفضا واسع
بشعاع خيوط
وانا وحيدة
لكن عنيدة
وبإيدي اجدف
واغزل شطوط
بر الأمان جوة عقلي
وف ضميرى
ولقمتى من صنع يدي
وقرارى اخدو أنا
مش حد غيرى
متفكروش إني بنية
مكسورة الجناح
دانا صبية بالف راجل
وانا ست الملاح
وتكون فضيحة بجلاجل
لو طلبت من أي راجل
سلاح
أو حتي عون
مش بعيد تتهموني
بالجنون
وتجزموني.. بحذف
نون
دانا صبية.. ابان ضعيفة
لكن قوية
وسلاحي صبر وحنية
وممكن اعيش ف البحر
كأني عروسة  وجنية
اغزل شبك
واكل سمك
وبعون من ربى اللي
خلق
اعمل م الودع
عقد وحلق
وان صابني حبة برد
خدودي تطرح ورد
واجدل ضفايرى
مجدافين
والموج حاشاغله
بر مش عين
وان وقعت ف
عرض البحر
احسن كتيير من
عرضكوا
وان عشت مني للسما
اامن كتير من
ارضكوا
مش عايزة حاجة
منكوا
واحسبوها..
بالقلم والمسطرة
والمناقل والبراجل
راح تعرفوا.. اني
صبية بالف راجل
......
نظم /محمد صادق ندا
مصر