إلا عينيكي المتلونة / بقلم الأديب عادل عبد الرازق

إلاّ عينيكي المتلوّنة

**************

بقلمي / عادل عبد الرازق

-----------------------

كل اللي كان ..

كان ملكنا

على قدّنا ..

إنتي وانا

ولا خوفنا برد الطريق

ولا ارتعش في الليل كفنا

كنا بنرسم حلمنا ..

على وشنا وفي دربنا

واضح وضوح الفجر الوليد

زي الخطوط على يدّنا

كل اللي كان ..

كان ملكنا

على قدّنا ..

إنتي وانا

راح اللي راح ويّا الزمن

وطعم الجراح بقى يشتهيني

كان سهل اصدّق أي شىء

إلا إنك تودّعيني

إنجرحت ف كل شىء ..

في المشاعر والطريق ..

والكلام اللي كان دايماً رقيق ..

واتاريكي كنتي بتخدعيني

وانتهى ف لحظة حبنا

كل اللي كان ..

كان ملكنا

على قدّنا ..

إنتي وانا

زيّ غيرك ألف لون

زي غيرك ألف شارع

كل ما فيكي بيخون

كل ما فيكي كان ضايع

قبلت ماضيكي باللي فيه ..

وحاولت إني اغيّر فيه ..

لقيتني عايش وحدي بيه ..

وما طولت منه غير المواجع

الي فرّق بينا حاجة واحده

هيّا اختلافنا عن بعضنا

كل اللي كان ..

كان ملكنا

على قدّنا ..

إنتي وانا

صدّقيني كنت عارف

بس خايف أبدأ أنا

بس انا ما كنت عارف

إن الشفايف مرّ وضنا

كل اللي فيكي كان كداب ..

وعينيكي الصافية مليون سراب ..

وهوامش وكسور وعذاب ..

كان صافي كل شىء

كان واضح كل شىء

كان صادق كل شىء

إلا عينيكي المتلوّنه

كل اللي كان كان ملكنا

بس مختلفين انتي وانا

فتحنا إيدينا في الريح

طارت كل حاجة مننا