💞 سطرين وجع 💞
************
محتاجة إيه من صرختي ⭐ يا كدبة الأيام
محتاجة أحزاني ⭐ طب دافعة فيهم كام
يا لعنة الحب اللي كان أوهام
نامي لعلك تحلمي بأحزان
شايفك في آخر حد ف حدودي ⭐
سطرين وجع عايشين علي وجودي
مهما تنادي الحرف ف سكوتي ⭐
مهما بخداعك تعلني موتي
تفضل حقيقة حبك الباهت ⭐
رغم الخداع متشالة من صوتي
لِمِّي السنين خبِّيها ف ضلوعي ⭐
ناوي الرحيل لا معني لرجوعي
إقري السطور لو ناوية تنسيها ⭐
تلقي السطور مكتوبة بدموعي
بركان ألم محفور ف شرياني ⭐
م المستحيل أرجعله من تاني
قلبي البرئ شاور علي جروحي ⭐
خجلانة منك ولَّا من روحي
مجني عليه إزاي أكون جاني
جاوبي لعل دموعي تِغفِرلِك ⭐
كُنتِ الأمل والقلب سافِرلِك
ما كانش عارف حَقيقتِك المُرَّه ⭐
لو شاف ملامح للخداع مَرة
كان إبتعد مع إنه واصِلِّك
يا ما إشتَهيتْ لحظة دفا تنزعني م الأحزان ⭐
يا ما إبتَدِيتْ وبدايتي كلمة صدق مبتِكدِبش
مين اللي قال الحب آخره بطش
شُفتِ السنين المُرَّه جابت إيه
جابت مرار بعد العذاب والقهر
من غير ما تطلب مهر
راجعي الكلام اللي إبتَدِتْ قصة هواكِ بيه
تِلقِي الوعود الصادقة سابقاني ⭐
تِلقِى الليالي الصافية راسماني
لحظة وفا مخلوقة من تاني ⭐
خَلِّتْ سنين الحب عنواني
لو يوم أغيب 🌟 تِلقِي الحنان بيضم
فاضل سؤال ف القلب مِتشَالِكْ
رغم إنتحار الحب ⭐ مين اللي يوم ضَلِّكْ
إني برغم الجرح ⭐ قلبي ح يِفضَلِّكْ
💢 أشعار بسام أبو مصطفى💢
ليست هناك تعليقات:
إرسال تعليق