أربع حروف
*********
بقلمي / عادل عبد الرازق
********************
علميني اكتب حروف
مش حروفك
واقلع جلد البدن
والروح
لحظة ما اشوفك
أنا اللي محيرني توهتك
أنا اللي داهشني خوفك
الغربة على وشك
وفي كلام شفايفك
حروف الضياع
...
ما تكمليش
ما تنطقيش
أنا الغريب أنا
من ألف عام
ومن مليون سنة
أبدريني عالمفارق
للي تايه واللي فارق
واللي في البحر غارق
أنا في عشقك
مجرد عابر سبيل
في دروبك تاه وضاع
...
في الشوارع
البيوت كانت منافي
والخيول المتركنة في أوصافي
يا حبيبتي من خشب
والريق في حلقي
علقم وارتجاع
...
ما تحزنيش لو جفت بحوري
ولا لو ضاع تصريح مروري
أنا كده كده غريب
الزمن اشترى فيه وباع
...
نزعت قلبي بضوافري
ولحم قلبي شكّلت منه أوزوريس
والجن سكن بدني وأوصافي
وحط في كل دروبي المتاريس
كل اللي بيني وبينك دلوقتي
مشربية وبيت قديم
وجوز حمام
وذكريات وشوية سنين
أخر مرّة شوفتك فيها
كل اللي بينا في لحظة
ضاع
نزفت شفايفك أربع حروف
أول حرف واو
وتاني حرف دال
وتالت حرف كان ألف
وأخر حرف كان عين
***
عادل عبد الرازق
*************
ليست هناك تعليقات:
إرسال تعليق