يمين بالله انا حبيتك لله ف لله
والحب ده لو يوم يتقاس يتخطى مداه
انا اكتر واحد بيحبك واتعلق بيك
ولقيت أنا روحي من غيرك ينقصها حياة
أنا لو هتكلم عن حبك هحتاج لسنين
حتى أتمنيت مليون مرة يبقى لي قلبين
الأول يكتب في غرامك شعر ودواوين
والقلب التاني يغنيلك والناس سامعاه
اليوم من غيرك ولا يسوى وكأنه ما جاش
واللحن اللي مايحمل صوتك ده ما يتغناش
يكفيني أما يجيني عبيرك أنا ما أتوصاش
تحس انا طفل و في ملاهي ومصروفه معاه
قالوا ع الحب مرار طافح والم ودموع
وطريقه صعب على العاشق و مافيهش رجوع
رديت ع الدنيا وقلت لها وبصوت مسموع
كل ده مش فارق ويايا طول ما أنا وياه
انت اللي قفلت عليه ضلوعي بضبة ومفتاح
وحبك متحاط جوه كياني بحرس وسلاح
لو يوم فكرت انك تبعد هحتاج جراح
واصبح زي قيس اللي اتجنن علشان ليلاه
---------------
محمد سيف الدين محمد
شاعر ـ كاتب
ليست هناك تعليقات:
إرسال تعليق