كل عام وانتم جميعا بالف خير ورمضان كريم
من ديوانى ( جبين الحب) زجل (ليالى رمضان)
ياللى مليت الكـــون أنـــوار // صبح وظهـر وليــل ونهـار
ياللى فى بحـر الطاعة تاخـدنا // وتقفــــــــل أبـــواب النـار
دا انت نجاتنا كبير وصغـير // وانت هـــداية للحــيران
ومافيش حد بينكر خـــيرك // غير الحاقـــد والبطـــران
دا انت الركعة بسبعـين ركعة // وانت شموسك دايما ساطعه
سبعــــين الف الله بيعتقــــهم // بعد ماكانت النار دى مكانهم
ودا فى الليله الواحــدة كمـان // شهر العفــو والإحســان
الحـق نفســك ياالله وتــوب // عصيان ربك مش مرغـوب
فرصة وجت لك تمحى ذنوب // عمرك عند الله محسـوب
ياللى بتروى قلـــوبنا تملى // واحنا بنقــرأ فى القـــــرآن
يارب تشفـــع رمضـــان // يوم مانقابـلك ياحنـــان
اجرى عشان اصلى الترويح // ويارب مايحرمنا حضــورك
صحبه ولمه وخير وسعـادة // دى بقت فرض ماهياش عادة
ليله القــدر يااعظــم ليله // صلى فى ليلها وصحى العيله
اوعى تسيبها صيام وقيام // أجرها فــاق التمانـين عـام
ياللى دعانا فيه مرفــوع // قبل فطارنا سجـود وركـوع
شوف الكون فرحان ومنور // اشكــرـ ربك ابقى سعـــيد
فى رحــابك فرحتنــا تزيد // نفـرح عند قــدوم العــيد
فَاْعِلُنْ فَاْعِلُنْ فَاْعِلُنْ فَاْعِلُنْ // فَاْعِلُنْ فَاْعِلُنْ فَاْعِلُنْ فَاْعِلُنْ
زجل / عبدالصمد عبده . عضو اتحاد كتاب مصر
كل عام وحضرتك بالف خير وصحة وسعادة ورمضان كريم اللهم بلغنا رمضان
ردحذف