كل الاماكن
...........
كل الاماكن بتفكرني بيك
كل الاماكن فيها صورتك
فيها ريحتك
كل الاماكن
أشتاقت كتييير لصوتك
ويّا ضحكتك
كل الاماكن مشتقالك
والطرقات حنت كتيييير
لخطوتك
لسه الاحبة على عهدهم
متفرقوش
والأ شجار ب تسأل كل ليلة عنك
وبترسل لروحك
مع الحمائم
رسالة شوق وعتاب
ياارب تكون بتوصلك
وشجرة الرمان مربوطة
بخيط جامد
وانا مازلت ماسك بخيط دايب
وما اعرفش اعيد الحكايات من الاول
ونوبة الحزن ملازمانى من زمان
بادخل فيها قبل ما انام على طول
سكتك هطول ياصاحبى
وانا موجوع
لسه
باخبى دموعى عن الطرقات لتشوفها
لتعرف انك مش هتعود
تحّرمني امشى فيها تانى
او تسد ف وشى الطريق
علشان ب امشى فيها وحدى
ماسك ف ايد نفسى
ومش عارف اختار صديق
ماكنش العشم ياصاحبى تسيبنى وتمشى
كل الحاجات الحلوة اللى بتمشى
ما بترجعش
وان اردت اعيش من غير وجع معرفش
كل الاماكن فيها ريحتك
فيها صورتك
والطرقات
اشتاقت كتييير لخطوتك ويا صوتك
ويا ضحكتك
وبتبعتلك كتيييير سلام
..............
بقلم // جمعه عبد المنعم يونس
مصر العربية
11 نوفمير 2017
ليست هناك تعليقات:
إرسال تعليق