السلام عليكم
بقلم وصوت ميلمي إدريس / المغرب
قصيدة زجل الغُربَة
فْ خَاطر لحبابْ ؤو لصحَابْ
ؤونَاسْ الغُربَة
توَحَّشتْ الغُربَة ؤو أَنا فدَار الغُربَة
الغُربَة لَحنِينَة ؤو زِيد العَتْبَة
توَحَّشتْ الوَصلَة ؤو فرِّانْ الدرِيبَة
توَحَّشْتْ لَعجِينَة ؤوومِّي لَحبِيبَة
علاَشْ أَلِيَّامْ دييييما انْتِي كْهِيبَة
ؤو أَنَا مَااااضَاربْ حَسبَة
الْهَاد لَغْرِيبَة
هجَرتْ بْلادِي ؤوَتلاَحِيتْ فمصيبَة
تَالفْ بِينْ لْمَّاجْ وَاخَّا الحدُود قْريبَة
ااااايهْ علِيكْ يَا الضَّحكَة لَكْهِيبَة
ضْربْتِينِي بكْسُورِي
ؤو لحتِينِي كِي شِي لْعِيبَة
نَوصِيكْ يَاولد بْلاَدِي لَحبِيبَة
لزَمْ دَارك ؤوبْلاَدك لاَتْقُولْ تَنْشِيبَة
رَاهْ الأَصلْ أَصلْ
وَاخَّا بمْيَاتْ تشْرِيبَة
فْخَاطَر لحبَابْ ؤَولصحَابْ
ؤونَاسْ الغُربَة
توَحَّشتْ الغُربَة ؤوأَنا فْدار الغُربة
الغُربَة لَحنِينَة ؤوزِيد العَتْبَة
توَحَّشتْ الوَصلَة ؤو فرَّانْ الدريبَة
توَحَّشتْ لَعجِينَة ؤوومِّي لَحبِيبَة
البُلْدَانْ كُلْها زْوينَة
ِغِييي بْلاَدِي
الِّلي سَالتْ علِيها الدمِيعَة
البُلدَانْ كُلها جْمِيلَة غِييي بْلاَدِي
الِّلي شَعلَتْ لِي الشْمِيعَة
يَا صَاح جُولْ ؤو زِيد جُولْ
ؤو علاَ بْلاَدكْ مَاااعنْدَكْ مَاتْقُول
طلَع الصبَح ؤوبَان المَعقُولْ
ؤوالسُّوقْ مْيَّزْ الفْحُولْ مَن العجُولْ
ؤومَا البْلاد وْلاَدها وْلاَد الأُصُولْ
مْغَارِبَة أَحرَار بْسَرجْهُمْ خْيُولْ
وَاقْفِينْ صَامْدينْ
يَد وَحدَة لالالاَتْقُولْ
ضَد دُوكْ الخَوَنَة
الِّلي ضْرَبْهُم حمَار الِّليلْ
ؤولْسَانْهُمْ دِيييمَا مَشْلُولْ
فْخَاطَر لَحبَابْ ؤولَصحَابْ
ؤونَاسْ الغُربَة
توَحِّشْت الغُربَة ؤَوأَنَا فْدَارالغُربَة
الغُربَة لَحنِينة ؤوزِييييد العَتْبَة
توَحَّشْت الوَصلَة ؤوفرَّانْ الدرِيبَة
توَحَّشْتْ لَعجِينَة ؤوومِّي لَحبِيبَة
فخَاطَر لَحبَابْ
ؤولَصحَابْ
ؤَونَاسْ الغُربَة
قصيدة زجل بقلم وصوت ميلمي إدريس
المغرب /فاس/30/06/2020
ليست هناك تعليقات:
إرسال تعليق