دندنات قلبيه من الشعر المحكي من تراثنا الخالد شعر غنائي من المربع والمقسوم
كل ما جيت لحد الباب
قلبي بتوقف دقاتو
ما بعرف شو هالاسباب
وما بعرف شو حكاياتو
تع شوفي انا قلبي كتاب
حروف الغزل خفقاتو
صوتي بيصدح للاحباب
نبع الشعر أب أبياتو
بحروفي عطر الملاب
عطر الكون بنسماتو
وحياتك انا قلبي تاب
لم من صرتي حياتو
ونظراتك لو فيها عتاب
بيدك تمحي زللاتو
في حبك انا قلبي طاب
حسنك بلسم علاتو
بعيونك قوس ومحراب
بتعبد في آياتو
وسهم عيونك فيّ صاب
شك بقلبي نظراتو
ناطر من عندك جواب
تشفي صدري وآهاتو
لا تزيدي بجسمي العذاب
صار بيحكي ويلاتو
سكران يهوجس بغياب
شارب ميّت دمعاتو
لا تردي قلبي اللي شاب
وراسي شابت شعراتو
أحنا في طور الشباب
سنين العمر وشمعاتو
أسمك في قلبي ما غاب
يطرح حب بزهراتو
وسلامتكم عذرا هذي مشاعر شاعر من وحي الخيال
شعر نائل صالح ضميدي
ليست هناك تعليقات:
إرسال تعليق