وصاية اب لابنه
اوصيك يا ابني حين العمر يخلص
تدّور على زين الافعال بين الناس
خلك موصوف بالاخلاق والطيب
ورافق اصحاب الدين والنوماس
ترى فعايلك الزينه ما تنتسى وتضيع
اجرها يصل ويترحم على ابوك الناس
ورحمك يا بوي اوصيك دوم ترضيه
واياك تزعله او تجرح له احساس
واوصيك يا ابني تكون عمود البيت
واهلك واخوانك تحطهم فوق الراس
وتعطيهم القوه والمدد والعون
وتكون الهم القاعده كحجر الاساس
ولا تنسى كل اللي كنت احكيلك اياه
ترى رح تشوفه بعدي وتحفظه بكراس
ورح تخبر فيه ابنك واحفادك من بعدك
ويكون نهجنا ويبقى إلنا قاعده ونبراس
خلك يا ابني دوم مثل الذهب يلمع
كل الي يشوفك يفضلك عن الالماس
واياك يا ابني تكون مثل الحديد يصدأ
مع العمر يذوب وبالرجلين ينداس
ولعلمك يا ابني الدنيا يوم الك ويوم عليك
وازن بينها ولا يغرك بعض فعايل الناس
اعمل يا ابني بالي يرضي ربك وضميرك
واترك الباقي يا ابني ولا يهمك كلام الناس
ولا تنسى زرع الخير في حِلَك وترحالك
ترى ثمرة الخير تزيد محبتك بين الناس
واعلم يا ابني مهما طال الزمن فيك
الاجل مكتوب ورح تشرب من نفس الكاس
واحمد الله يا ابني على كل صغيره وكبيره
يرضيك ربك يا ابني وتكون اسعد الناس
هذه وصيتك الك قبل ما تخرج الروح
حافظ عليها واجعلها في حياتك مقياس
بقلمي: جهاد الشرايري
الاحد٢٠٢٠/٦/٧
ليست هناك تعليقات:
إرسال تعليق