بقلم الفنان المبدع الشامل الاستاذ بلعباس المختار الشاعر و الزجال الغنائي و القاص و المسرحي و الملحن و المغني الطربي و الرياضي من المغرب
واش أمالنا فزيان لحال قلال
( قصيدة بالزجل الغنائي المغربي )
لحال حوال و حالنا ما هُو حال
ما تيعرفو و ما تيشبه لو ذاك لحال
هذاك لي ما راد ليه حد لبال
راه حالنا لكل خايبة تلݣاه ميال
صبح فأرض الله الواسعة جوال
عندو كي لحرام كي لحلال
حالنا غبر ما هَل عليه هلال
صابو زُغبي نسيان و كثرة لإهمال
واش زعمة يمكن يتصلح ، محال
و هذا كبر ضرب من لخيال
و شحال شابت من غرايبو لجيال
و ضقنا و ضاقت من لعوبو لجبال
و صاب جميع لعباد بلختلال
كَثَر عليهم كل دوايرو و لقوال
و بعدهم من لهمة و شان و لإقبال
خلاهم تايهين و تالفين بحال
لمجدوب مرة غنَا و مرة موال
و توَلوِيل لسانُو بين لقيل و لقال
لابس دَربَالَة و على حالو عَوَال
ما حَاس بجُوع لا بمَسَافَات طوَال
لا هو خَايَف من لَقفَار و لَغوَال
ما تهمو تجارة لا إيجارة و لا عمال
هو و ذاك لميت راهم بحال بحال
و علا من نشكي و شكون نسال
واش أمالنا فزيان لحال قلال ؟!!
و لا غير تَيَخيَاب وَ زَايَد تَيَكحَال
أمالنا و رجائنا فيك يا ذا الجلال
تخلي حالنا و حوالنا نورهم شعال
تنجي شبابنا من لنتحار و لهبال
يرجعو جميعهم لحال ناس لعقال
و عليهم خفف يا لغاني هاذ لَحمَال
بجودك و كرمك و فضلك يا لمتعال
الشاعر و الزجال الغنائي و القاص
ذ . بلعباس المختار
ليست هناك تعليقات:
إرسال تعليق