في لحظة ما بتكتشف إنك كنت محتاج نفسك
بقلم/نشأت البسيوني
في وقت من أوقات الحياة الإنسان بيقف مع نفسه وقفة مختلفة ويبدأ يسأل هو أنا كنت بعمل كل ده ليه وليه كنت بجري طول الوقت عشان أرضي ناس مش شايفين تعبي وليه كنت بخاف أقول لا وليه كنت بقبل حاجات بتوجعني لمجرد إني ما أخسرش حد ومع الوقت بيكتشف إن أكتر شخص أهمله طول السنين كان هو نفسه كان بيسمع مشاكل الناس وبيحاول يخفف عنهم وبيجامل عشان ما
يزعلش حد وبيسكت عشان يحافظ على علاقة وبيتنازل عشان الدنيا تمشي وفي وسط كل ده نسي يسأل نفسه هو مرتاح ولا لأ الإنسان أحيانا بيعيش عمره كله وهو بيحاول يكون الشخص المناسب للجميع وفي النهاية يكتشف إنه بقى غريبا عن نفسه لأن كثرة التنازلات ممكن تخليك تخسر حاجات مهمة جواك وأولها إحساسك بقيمتك مش معنى إنك بتحب الناس إنك لازم تنسى
نفسك ومش معنى إنك طيب إنك لازم تقبل الأذى ومش معنى إنك بتحب تحافظ على العلاقات إنك تفضل في علاقة بتكسر فيك كل يوم في فرق كبير بين إنك تكون إنسانا متسامح وبين إنك تسمح لحد يستغل طيبتك وبين إنك تكون حريصا على اللي بتحبهم وبين إنك تلغي وجودك عشانهم الإنسان محتاج يتعلم إن كلمة لا مش قسوة وإن البعد مش كراهية وإن اختيار الراحة مش أنانية وإن
حماية النفس مش معناها إن القلب بقى حجر يمكن ناس تزعل منك لما تبدأ تحط حدود لكن ده مش معناه إنك غلطان لأن بعض الناس اتعودت على النسخة اللي كانت بتوافق على كل شيء وتسكت عن كل شيء ولما تتغير وتبدأ تحترم نفسك هتستغرب منك لأنها كانت مستفيدة من تنازلاتك مش من حبك ويمكن أصعب حاجة إنك تكتشف إن شخصا كنت بتعتبره قريبا منك ما كانش بيشوفك بنفس
الطريقة وإن كل المواقف اللي كنت بتفتكرها حب كانت بالنسبة له مجرد مصلحة أو عادة لكن حتى الاكتشاف المؤلم ده له قيمة لأنه بيفتح عينيك على الحقيقة وبيخليك تختار بعناية أكتر ومش لازم تكره الشخص اللي اكتشفت حقيقته يكفي إنك تعرف مكانه الحقيقي في حياتك وتحطه في المساحة المناسبة من غير انتقام ومن غير محاولة لتشويه صورته لأنك لما تخرج من علاقة مؤذية
وأنت شايل كراهية كبيرة بتكون لسه مربوط بيها لكن لما تخرج بهدوء وتتعلم الدرس بتكون فعلا بدأت تتحرر منها الحياة مش دايما هتديك تفسيرا لكل حاجة حصلت ومش كل سؤال هتلاقي له إجابة ومش كل شخص هتعرف ليه تغير ومش كل علاقة هتفهم سبب نهايتها لكن مش لازم تعرف كل الأسباب عشان تكمل أحيانا يكفي إنك تعرف إنك تعبت وإنك حاولت وإنك عملت اللي تقدر
عليه وإن الاستمرار بقى مؤذيا ليك وقتها يكون الرحيل أرحم من البقاء وأحيانا الإنسان بيقضي وقتا طويلا مستني كلمة اعتذار من شخص مش ناوي يعتذر وبيستنى تقديرا من شخص مش شايف تعبه وبيستنى اهتماما من شخص مش مهتم وفي النهاية بيكتشف إن انتظار الأشياء من الأشخاص الغلط هو اللي كان بيتعبه أكتر من غيابهم وعشان كده لازم تعرف إن قيمتك مش مرتبطة باهتمام
شخص بيك وإن عدم تقدير شخص ليك مش معناه إنك قليل القيمة وإن رحيل شخص مش معناه إنك غير محبوب أنت تستحق الحب لكن مش كل شخص قادر يحبك بالطريقة اللي تستحقها وتستحق الاحترام لكن مش كل شخص عنده القدرة إنه يحترمك وتستحق الاهتمام لكن مش كل شخص يعرف قيمة الاهتمام اللي بتديه وعشان كده ما تقيسش نفسك من خلال عيون الناس لأن
الناس بتشوفك حسب تجاربها ومصالحها ومشاعرها وأحيانا أحكامها المسبقة لكن أنت أدرى بنفسك وبالطريق اللي مشيته وبالحاجات اللي تحملتها وفي الحياة هتقابل ناس تخليك تحب نفسك أكتر وناس تخليك تشك فيها وهتقابل ناس تشجعك وناس تحبطك وناس تفتح لك أبواب وناس تحاول تقفل كل الأبواب قدامك لكن في النهاية القرار ليك أنت مش مطالب تصدق كل كلمة
تتقال عنك ومش مطالب تثبت نفسك لكل شخص ومش مطالب تشرح اختياراتك لكل الناس لأن الإنسان لما يعرف نفسه كويس مش هيكون محتاج كل شوية يدافع عن وجوده وفي مرحلة معينة هتتعلم إن راحة بالك أهم من إنك تكسب كل نقاش وإن الهدوء أهم من الرد على كل استفزاز وإن بعض المعارك الأفضل إنك ما تدخلهاش أصلا لأن مش كل شخص يستحق وقتك ومش كل كلمة
تستحق ردك ومش كل موقف يستحق إنك تستهلك مشاعرك عشانه والنضج الحقيقي إنك تعرف إيه اللي يستاهل وإيه اللي ما يستاهلش وأحيانا أكبر انتصار إنك تسكت وتمشي وتسيب الأيام تثبت الحقيقة من غير ما تشرح نفسك لأن الوقت كفيل إنه يكشف حاجات الكلام ما يقدرش يكشفها والإنسان اللي ظلمك ممكن يكتشف الحقيقة متأخر لكن ده مش لازم يكون هدفك لأن هدفك
الأساسي إنك ترجع لنفسك وتعيش في سلام وتبني حياة جديدة ما يكونش الماضي هو اللي بيتحكم فيها ويمكن أجمل حاجة تعملها لنفسك إنك ترجع للحاجات اللي كنت بتحبها قبل ما تنشغل بإرضاء الآخرين ترجع تضحك من قلبك وترتاح من غير إحساس بالذنب وتقول لا لما تكون مش قادر وتقول نعم لما تكون فعلا عايز وتختار الأشخاص اللي وجودهم يضيف لك مش الأشخاص اللي بياخدوا
منك كل شيء ولا يعطوك حتى شعورا بالأمان اهتم بنفسك لأنك مش آلة وما ينفعش تفضل طول الوقت متاحا للجميع أنت كمان محتاج راحة ومحتاج وقت لنفسك ومحتاج تبعد عن الضوضاء ومحتاج تسمع أفكارك من غير أصوات كثيرة حواليك لأن الإنسان لما يفضل طول الوقت وسط الزحام ممكن ينسى صوته الداخلي وفي النهاية مش عيب إنك تغير مش عيب إنك تعيد حساباتك مش
عيب إنك تكتشف إن الطريق اللي اخترته زمان ما بقاش مناسب ليك مش عيب إنك تقول أنا كنت غلطان ومش عيب إنك تبدأ من جديد الإنسان مش تمثال ثابت الإنسان بيتغير وبيتعلّم وينضج وكل مرحلة في حياته بتضيف له شيئا جديدا المهم إن التغيير يكون للأفضل وإنك ما تخسرش نفسك وأنت بتحاول تكسب العالم كله وخلي عندك يقين إن اللي خرج من حياتك مش بالضرورة
يكون خسارة وإن اللي اتأخر عنك مش بالضرورة يكون شرا وإن اللي ما حصلش ممكن يكون فيه خير ما كنتش شايفه يمكن اليوم اللي أنت شايفه صعب يكون هو بداية مرحلة أقوى ويمكن الخسارة اللي وجعتك تكون هي السبب في إنك تعرف قيمتك ويمكن الوحدة اللي خفت منها تكون هي الفترة اللي رجعت فيها لنفسك ويمكن البعد اللي كنت بتقاومه يكون هو المسافة اللي احتجتها عشان
تشوف الحقيقة بوضوح وفي النهاية الإنسان محتاج يرجع لنفسه قبل ما يبحث عن أي شخص آخر محتاج يعرف إنه يستحق الراحة ويستحق الاحترام ويستحق علاقة ما يضطرش فيها يمثل ويستحق صحبة ما يخافش فيها من الخلاف ويستحق ناس تفرح لفرحه وتحزن لتعبه وتقدر وجوده من غير شروط لأن الحياة أقصر من إنك تعيشها طول الوقت خايف من خسارة أشخاص مش
بيحافظوا عليك أصلا وأقصر من إنك تفضل تبرر نفسك للناس وأقصر من إنك تهدر سنين وأنت بتحاول تثبت إنك تستحق مكانا في قلب شخص لا يريد أن يعطيك هذا المكان خليك قريبا من نفسك وكن صادقا معها واعرف إمتى تتمسك وإمتى تترك وإمتى تتكلم وإمتى تصمت وإمتى تسامح وإمتى تضع حدا واضحا لأن احترامك لنفسك هو أول خطوة في احترام الآخرين ليك وأجمل ما
ممكن توصل له في حياتك إنك تبقى مرتاح مع نفسك مش محتاج تصفي حسابات ومش محتاج تثبت إنك انتصرت ومش محتاج تشوف شخصا ندمان عشان تحس إنك كنت صح يكفي إنك خرجت من التجربة أقوى وأوعى وأهدى وأقرب لنفسك ويكفي إنك تعلمت إن قلبك غالي وإن وقتك غالي وإن مشاعرك غالية وإن وجودك في حياة أي إنسان لازم يكون مقدرا ومصانا يمكن أهم درس نتعلمه
إننا ما نستناش الدنيا تعلمنا قيمة أنفسنا بعد ما نتعب لازم نعرف قيمتنا من البداية ونحافظ على قلوبنا ونختار بعناية ونحب بصدق لكن من غير ما ننسى إنفسنا لأن الإنسان لما يعرف قيمته مش بيحتاج يقلل من غيره ولا يطارد اللي اختار البعد ولا يعيش أسيرا لرأي أحد يكمل طريقه بهدوء ويترك خلفه ما يؤلمه ويحتفظ بما علمه ويبدأ من جديد بقلب أكثر وعيا وروح أكثر هدوءا ونفس
تعرف أخيرا إن الاهتمام بالنفس مش غرور وإن اختيار السلام مش هروب وإن بداية الحياة الحقيقية ممكن تبدأ من اللحظة اللي تقول فيها لنفسك أنا كمان أستحق أن أكون بخير
