في حضرة الشام
***************
فليت الشام وما شبعت منها،
يا شام يا روحي، يا حلوة سنينها.
إجيتِك عطشانة والشوق بعيني،
ولمّا شفتِك، ضحكت سنيني.
بسوق الحميدية قلبي انبسط،
ومن ريحة الياسمين قلبي غنّى.
دخلت الجامع الأموي وخشعت،
وحسيت روحي رجعت من جديد.
من القيمرية عَ القباقبية مشيت،
وأنا فرحانة بالشام ودفاها.
وعَ قهوة النوفرة قعدت شوي،
شربت قهوتي وروّقت بالي.
وزرت قصر العظم وما نسيت،
ولا باب توما، اللي فيه حنّيت.
بيوت شامية، حجرها دافي،
وقلوب أهلها للضيف بتكفي.
وبعدها عَ الصالحية كانت خطوتي،
ومن عند الشعلان كمّلت مشواري.
وعَ الميدان مشيت بدروب حلوة،
وبالجزماتية ريحة الشام فايحة.
وكل حارة إلها حكاية،
وكل زاوية بتحكي رواية.
وهوي بلّودان والزبداني،
وجلسة الربوة الشامية،
فيهن من الشام سحر تاني،
وفيهن بتحلى لي أيامي.
يا شام يا حنونة، يا شام الغالية،
يا نبضة قلبي، يا ست الدار العالية.
بتستاهلي الراحة والخير،
وبتستاهلي العمر كلّه هون.
فليت الشام وما شبعت منها،
وكل ما برجع لعندِك، بشتاقلك أكتر.
يا شام يا شام، يا حلوة الدنيّة،
بضل أحبّك يا دمشق الأبدية.
بقلمي بسمة
ليست هناك تعليقات:
إرسال تعليق