(قعدة مع النفس)
٠٠٠٠٠٠٠٠٠٠٠٠٠٠٠٠٠
قعدت شوية مع نفسى
أحاول أكتشف من تانى نفسى
وأغربل أفكارى وحواسى
وأشوف أنا رايح فى النهاية على فين!!!
هل كل حياتى كانت صح وألا غلط؟
وهل أنا إنسان ثابت وراسى ؟
وألا كل شئ جوايا إتلخبط و إختلط؟
وهل أمشى ورا مشاعرى وإ حساسي؟
وألا فى النهاية هسف تراب وأبلع زلط؟
وأبكى دم٠٠٠ بدل ٠٠٠٠٠٠٠٠٠٠٠٠٠ دموع العين!!!
صدقونى مش ٠٠٠٠٠٠ عارف
لإنى أصبحت من كل شئ خايف
لإن الكدب ملا القلوب٠٠٠٠
وأصبح بيسيل من الشفايف
والضباب غيم على العيون٠٠٠
وأصبح الكل ٠٠٠٠٠ مش شايف
وكترت ٠٠٠ الشكوى٠٠٠٠ والنحيب ٠٠٠ والأنين!!!
يمكن لإننا بعدنا عن منبع السلام
اللى بيفيض علينا من إله السلام
ونار المحبة بردت جوانا
والدنيا أصبحت لاهيانا
ومن كتر الجفا٠٠٠
أصبحت قلوبنا ٠٠٠ بردانة
بتدور على ٠٠٠ الصفا٠٠٠ والوئام
ومشتاقة للمحبة القديمة٠٠٠ والدفا٠٠٠٠ والحنين!!!
أصبح كل إنسان بيدور ٠٠٠٠٠٠٠على مصالحه
حتى لو هيدوس ٠٠٠٠على أخوه٠٠٠
وميهموش إذا كان بيتسبب فى ألمه وجرحه
حتى الإبن بيتطاول على أمه وأبوه٠٠٠
اللى هما السبب فى وجوده وهناه ٠٠٠ وفرحه
ونرجع نقول ٠٠٠ أيوووه٠٠٠ أيووووه٠٠٠
على دا زمان ٠٠٠ مع إن قلوبهم دايمآ بتسامحه
لإن دا إبنهم حتى لو كان عليهم قاسى وضنين !!!
وأصبح من سمة العصر٠٠٠٠٠٠ النفاق
الناس بتستعمله كإنه الدوا والترياق
والتطبيل ٠٠٠ على٠٠٠ وإستفحل وفاق
كإننا دايمين فى الدنيا٠٠٠٠
مش هنسيبها ولا هيكون بكرة رحيل وفراق
الدنيا دايمة ٠٠٠والأماكن ٠٠٠لكن إحنا مش دايمين !!!
فليه نقطع فى بعض وفى صلة الرحم؟
وليه نصارع بعض فى عالم صاخب مزدحم؟
وليه نسبب لغيرنا بتصرفاتنا الضيق والألم؟
وليه يكون فيه ظالم ٠٠٠٠٠٠ وإنسان منظلم ؟
واللى مالوش حد ليه حاكم عالى قادر محتكم
قادر يرجع له حقه فى يوم من الأيام من اللى ظلم
عينيه صاحية ومبتنامشى حتى لو كل الناس نايمين !!!
الدنيا فانية ٠٠٠ ومش دايمة ٠٠٠ ومنفاتة
ومش هينفع الإنسان غير عمله الطيب وصفاته
والأثر الحلو اللى هيسيبه ٠٠٠ من بعد ٠٠٠ مماته
فهل هيغتنم الفرصة ٠٠٠٠٠٠ وألا هيضيع فرصا ته؟
ويرجع يندم حيث لا ينفع الندم على كل اللى فاته
واللى ظلمته ومات هترجعه تانى٠٠٠ إزاى٠٠٠ومنين ؟!!!
لازم نقعد مع نفسنا قعدة طووووويلة
ونحاسبها حساب عسير كل لييييييلة
ونشوف إيه اللى عملناه حلو وإيه اللى عملناه مر
قبل الزمن مايسرقنا٠٠٠٠٠ ويجرى بينا ٠٠٠٠٠٠ ويمر
وهل عملنا خير٠٠٠٠٠٠٠وألا٠٠٠٠٠٠٠٠٠٠٠٠٠٠٠ عملنا شر
فى دنيا ساعاتها مهما طالت٠٠٠ بينا قليلة
والعمر بينحسب بالمحبة ٠٠٠٠٠
٠٠٠٠٠٠٠٠٠٠٠٠٠٠٠٠٠٠٠٠ اللى قدمناها مش بعدد السنين !!!
ربنا وضعنا كأمناء فى الدنيا دى
نقدم المحبة للكل وبالخير ننادى
وقلوبنا تكون بيضة ونقية٠٠٠
مش متغطية٠٠٠٠٠٠٠٠٠ بالسواد ى
نطهر قلوبنا ٠٠٠ وتغير جلودنا
ونرجع للتعاليم الجميلة ٠٠٠
اللى علموهالنا ٠٠٠٠٠٠ جدودنا
نتكاتف مع بعض٠٠٠
من أجل الخير لبلادنا ولكل البلادى
ويكون كل واحد فينا على٠٠٠ ترابها وحدودها أمين !!!
وأنا من قبلكم بقولها دايمآ لنفسى
إنى لازم أطهر أفكارى وحواسى
وقبل ما أنصح غيرى لازم ولابد أنصح نفسى
وأتعلم من أخطائى فى حياتى اللى فاتت وأمسى
علشان نكون كلنا تحت مظلة المحبة والإخوة عايشين !!!
٠٠٠٠٠٠٠٠٠٠٠٠٠٠٠٠٠٠٠٠
بقلمى( إبراهيم صابر)
ليست هناك تعليقات:
إرسال تعليق