زجل
تذكار ضيعة
جوال خاطري بين السطور
شو بدي نقي من الزهور
كل زهر وإلو عطر فواح
العقل ذواق بحسن العطور
تذكرة كيف كانت ضيعتنا
حجارة بيوتها عالمحبه لمتنا
عابيت العتابا تسهر جمعتنا
ردي بردي حتى يشق النور
وحكايا ستي للولادها الصغار
حتى يتعلموا يحموا الدار
لا تأمنوا عامكر ذيب غدار
بضل البيت عامر بالسرور
بتموز نسرح عاحصيد حقلتنا
ندرس نطحن نعبي كوارتنا
حول الصاج نحنا وولاد حارتنا
نشبع زعتر لبنه وخبز تنور
عاندى تموز من الفجر نقوم
متل النحل حول الدوالي نحوم
نعبي سلال العنب من الكروم
نعصر نعتق الخوابي من المعصور
بالضيعة عنا رجال الكبار
عاشوا على الهيبة والوِقار
كانوا بالقرار خيرة الأخيار
لهيبة وِقارهم نحني الضهور
وين الشروال البعطر التعب مرشوش
وزنار عاخصر الرجال منقوش
يا حسره ضيعوا الشروال والطربوش
وهدوا حجارة العز تيبنوا قصور
بقلم الشاعر والأديب يوشع علي إسماعيل
ليست هناك تعليقات:
إرسال تعليق