!!!(سكوت٠٠٠كلنا هنموت)!!!
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
بنيجى الدنيا دى من غير إرادتنا
ونطلع منها برضه بدون٠٠٠ إرادتنا
أول مابننزل بنصرخ٠٠٠
ونقول ليه خدتونا وحرمتونا من جنتنا؟
بطن الأم دا كان عالم كبير وواسع
فصرخنا لما جينا وإنصدمنا بالواقع
جبتونا ليه للضيق؟
والتعب ونشفان الريق
فى اللى بتسموها للأسف ٠٠٠ دنيتنا؟
ومهما طال بينا ٠٠٠٠٠العمر
ومهما السنين بتجرى وتمر
للأسف برضه ٠٠٠هنسيبها ٠٠٠ ونموت!!!
٠٠٠٠٠٠٠٠٠٠٠٠٠٠٠٠٠٠٠٠٠
وشوية ٠٠٠ شوية كبرنا
وياريتنا ٠٠٠٠ ما كبرنا
كبرنا وكبرت٠٠٠
همومنا ومشاكلنا وإتغيرنا
وبقى كل٠٠٠٠ هدفنا
قدام كل اللى يشوفنا
بس شكلنا الخارجى ومظهرنا
بنجرى ٠٠٠ ونجرى ونتكفى
ومفيش٠٠٠ ولا شئ مكفى
ومش واخدين بالنا ويا أسفى
على الأوراق ٠٠٠٠
اللى بتنشف وتقع من أشجارنا
ودى أيامنا اللى بتقع مننا
ومش واخدين بالنا كإننا
دايمين فى الدنيا٠٠٠
وما جاش فى٠٠٠٠٠ ظننا
إننا فى يوم هنمشى ونسيبها لغيرنا
وهنسيب كمان٠٠٠
كل الفلوس اللى جمعناها والبيوت
لإن هيجى لنا يوم٠٠٠٠٠٠٠٠٠٠ ونموت!!!
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
الدنيا فى مظهرها جميلة وخداعة
بنجرى ورا جمالها وقلوبنا منصاعة
لكنها فى الحقيقة قلابة ٠٠٠ ولواعة
بنجرى وراها يمين وشمال٠٠٠
وفى الأخر٠٠٠
بنرجع بقلوب مكسورة٠٠٠ وملتاعة
ونقع لما ييجى أجلنا المحتوم والساعة
ونندم ونبكى بقلوب وعيون دماعة
ونرمى باللوم على الظروف كإنها شماعة
نعلق عليها أخطاءنا
وكل خطايانا وأهواءنا
ودا بعد العمر مايجرى٠٠٠٠٠٠ ويفوت
ويكون خلاص حل علينا٠٠٠٠٠ الموت!!!!
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
إلحق وقتك يااللى الحياة وخداك
فى سكتها اللى بلا رجوع مضيعاك
دا اللى بتخدعه نهايته بتكون هلاك
ربنا لما خلقنا فى الأصل٠٠٠
كان الواحد فينا نقى وبرئ زى الملاك
ولما وضعنا فى٠٠٠٠٠ الأرض
وأمنا عليها بالطول والعرض
علشان تعمرها وتزرع فيها الخير بيمناك
مش تزرع فيها٠٠٠٠٠٠٠٠ الشر
والغدر والتقتيل والكر والفر
لإن اللى هتزرعه مش هيجنيه ٠٠٠سواك
وإعرف إن مكانك ٠٠٠٠٠٠٠٠مش هنا
إنت مجرد ضيف لحد ما يإذن ربنا
وياخدك علشان تعيش دايم فى٠٠٠ سماك
فهل هتروح السما وإنت نضيف؟
وعف النظر وطاهر القلب وعفيف
ومحب لكل الناس ووديع ولطيف
وألا هتكون ٠٠٠
من اللى بيقولوا عليهم يا لطيف ٠٠٠؟
دا عمره ما عمل أى٠٠٠٠ خير
وكان سبب ضرر للكل والغير
وألا لو كان فيه خير ما كان رماه الطير
إلحق وقتك٠٠٠
قبل الوقت مايفوتك٠٠٠٠٠٠٠ ويطير
وتقف أمام الديان٠٠٠
اللى لا يعسر عليه٠٠٠٠٠٠٠٠٠٠ عسير
وتقف قدامه عريان ومكشوف٠٠٠
ومش على بعضك كإن تحتك و حواليك أشواك
قرر مصيرك إنت ٠٠٠٠٠وبنفسك
الفرصة لسه قدامك٠٠٠
طول ما أنت عايش وفيك حسك
لكن الفرصة هتضيع لما يهجم علينا الموت
والقلب يسكن٠٠٠ ويقف ٠٠٠ ويسكت الصوت
وندخل فى خانة اللى يموت٠٠٠٠٠٠٠٠٠٠٠٠٠ يفوت!!!!
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
بقلمى( إبراهيم صابر)
ليست هناك تعليقات:
إرسال تعليق