((أبويا))
أبويا كان طيب بسيط
قضاها دغري ومن غير وسيط
تمللي مسامح وسند الضعيف
شقيان ولقمته ف قلب البيت
******
يصحا الفجريه يقضي الفرض
ويذكر الله باسط الأرض
عاش ع القد ولايعرف قرض
والبال رايق زي الزيت
******
نصحني أوعاك تتعدي الحدود
ومع الأهل خليك ودود
وآخرتها الجته ياكلها الدود
المهم الذكري والتقوي ف البيت
******
أوعاك والأذيه النفس أماره
تجور ع الضعيف تعملها شطاره
تاخد الناصيه وتقفل الحاره
جاهد النفس خليك حويط
******
لله تمللي عليك فروض
إقضيها ف وقتها وبلاش وعود
يا عالم يمكن بالموت موعود
وأخبط راسك ف الحيط
******
وملامح أبويا نفس ملامحي
طول وعرض والبشره قمحي
الجينات نفس الجينات وتوفي
والطيبه لؤلؤ في بحر غويط
******
قضينا أيامنا بحلاوة الصفا
وتحت جناحاته محلي الدفا
ومهما وصفت أحقق الوفا
يا أبويا مش عايزه وسيط
******
ميت ألف رحمه ونور
يا سابق الخير بمليون دور
يا تقوي محاوطانا بألف سور
أبويا كان طيب بسيط
******
الشاعر محمد علي فرغلى احمد
ليست هناك تعليقات:
إرسال تعليق