خلينا اخوات واصدقاء
بقلم/نشأت البسيوني
كان فاكر إن الحب معناه إنك تدي قلبك من غير حساب وإن الثقة معناها إنك ما تسألش كتير وإن الإنسان اللي بتحبه لازم تصدقه حتى لو بعض التفاصيل جواك بتقول إن في حاجة مش مفهومة لكن في يوم واحد اتغيرت نظرته لكل حاجة لما اكتشف إن حبيبته كانت بتخفي عنه أمورا وتخضعه لبعض الأشياء من غير ما تكون صريحة معاه وفجأة حس إن في غمامة كانت على عينيه وإنه طول الفترة اللي فاتت كان شايف الصورة بالشكل اللي هو عايز يشوفه مش بالشكل اللي كانت عليه فعلا
قعد لوحده يراجع كل موقف وكل كلمة وكل مرة حس فيها إن في حاجة ناقصة وكل مرة سأل نفسه وسكت وكل مرة حاول يقنع نفسه إن اللي بيحسه مجرد خوف أو مبالغة لأنه كان بيحبها وكان عايز يصدقها وكان شايف إن الحب أقوى من أي شك لكن الحقيقة لما ظهرت قدامه ما كانتش مجرد حقيقة عن تصرف حصل كانت صدمة في الثقة نفسها لأن أصعب حاجة على الإنسان مش إنه يكتشف إن شخصا أخطأ لكن إنه يكتشف إن الشخص اللي كان مأمنه على قلبه ما كانش واضح معاه بالشكل اللي يستحقه
قال لنفسه يمكن أنا كنت أعمى من كتر الحب ويمكن قلبي كان بيبرر حاجات عقلي كان واقف قدامها ويمكن كنت بشوف منها الصورة اللي تمنيتها مش الصورة اللي كانت موجودة وافتكر كل المرات اللي دافع فيها عنها وكل مرة قال للناس إنها مختلفة وإنها تستحق الثقة وإنه مستحيل يشك فيها ثم ابتسم ابتسامة موجوعة وقال يمكن أنا اللي كنت محتاج أفهم من البداية إن الحب من غير وضوح بيتحول مع الوقت إلى تعب وإن الثقة لما تتبني على حاجات مخفية بتبقى سهلة الانهيار
ما كانش عايز يصرخ ولا يجرحها ولا يحول الحكاية إلى معركة لأنه رغم الصدمة كان لسه جواه تقدير لأيام عاشها معاها وكان عارف إن اللي بينهم ما كانش كله كذب وإن في لحظات جميلة فعلا وإن في مشاعر حقيقية عاشها هو على الأقل لكنه في نفس الوقت فهم إن استمرار العلاقة بالشكل ده ممكن يخليه يفقد نفسه أكتر
قابلها وقال لها أنا مش جاي ألومك أنا جاي أقول لك إن الصورة اتغيرت عندي أنا كنت شايفك بعين الحب وكنت بفسر كل حاجة لصالحك وكنت بديك ثقة أكبر من أي كلام لكن لما عرفت بعض الأمور حسيت إن الغمامة اتشالت من على عيني واكتشفت إني كنت محتاج أشوف الحقيقة زي ما هي مش زي ما كنت أتمنى تكون
سكتت هي وما لقتش كلاما كثيرا تقوله وكان واضحا إن اللحظة أكبر من أي تبرير لأن بعض الأشياء لما تتكشف ما بتحتاجش شرح طويل والإنسان ممكن يسامح لكن صعب يرجع لنفس النقطة اللي كان واقفا فيها قبل ما يعرف الحقيقة
قال لها أنا مش عايز أكرهك ومش عايز أشوه الأيام اللي كانت بينا ومش عايز أخلي النهاية سبب في إننا نحقد على بعض لكن كمان مش قادر أكمل بنفس الصورة القديمة لأن اللي اتغير مش مجرد موقف اللي اتغير هو إحساسي بالأمان
ثم قال لها يمكن الأفضل إننا نرجع خطوة لورا ونبقى أخوات وأصدقاء نحترم بعض ونفتكر الخير اللي كان بينا من غير ما نكمل في علاقة فقدت جزءا كبيرا من الثقة
كانت الجملة بسيطة لكنها كانت تقيلة على قلبه جدا لأنه ما قالهاش بسهولة هو قالها بعد صراع طويل مع نفسه وبعد ليال حاول فيها يقنع قلبه إن الحب قادر يصلح كل شيء لكنه اكتشف إن الحب وحده مش كفاية وإن العلاقة محتاجة صدق ووضوح واحترام وثقة وإن غياب حاجة من دول ممكن يخلي أجمل علاقة تتحول إلى سؤال دائم
هو ما كانش عايز ينتقم منها ولا يثبت إنها غلط وهو صح كان عايز يحافظ على آخر شيء جميل ممكن يفضل بينهم وهو الاحترام لأن بعض العلاقات لما تنتهي بشكل مؤلم تتحول إلى عداوة واتهامات وكلام جارح لكن في علاقات تانية يكون أصحابها أكثر نضجا فيعرفوا إن النهاية ممكن تكون هادئة حتى لو البداية كانت مليانة حب
قال لها أنا هفضل أتمنى لك الخير ومش هتكلم عنك بطريقة تقلل منك لأنك في يوم كنت شخصا مهما جدا في حياتي لكن من النهارده لازم يكون لكل واحد فينا طريقه وأنا اخترت إني ما أحملش في قلبي كراهية ليك وفي نفس الوقت ما أخونش نفسي وأكمل في علاقة أنا مش قادر أعيش فيها بنفس الثقة
يمكن هي وقتها فهمت إن أقسى شيء في الخلاف مش ارتفاع الصوت وإن أصعب كلمة ممكن يسمعها الإنسان مش كلمة غضب وإنما كلمة هادئة يقول فيها الطرف الآخر أنا ما عدتش قادر أكمل
مشى وهو حاسس بوجع لكنه كان لأول مرة من فترة طويلة حاسس إنه شايف الطريق قدامه بوضوح ما عادش بيحاول يفسر كل تصرف وما عادش بيعيش في دوامة الشك وما عادش محتاج يراقب أو يسأل أو يبحث عن إجابات لأنه فهم إن العلاقة اللي تخليك طول الوقت تدور على الحقيقة مش هي الراحة اللي كان بيدور عليها
وفي طريقه قال لنفسه يمكن الحب اللي عشته كان حقيقيا من ناحيتي ويمكن هي كان عندها مشاعر بطريقتها لكن المشاعر من غير وضوح ممكن تجرح والثقة من غير صدق ممكن تتحول إلى غمامة والإنسان مهما أحب لازم يفضل محافظا على نفسه
ومن يومها قرر إنه ما يكرههاش لكنه كمان ما يرجعش لنفس المكان وقرر إن الذكريات الجميلة تفضل جميلة من غير ما تكون سببا في استمرار شيء انتهى وقرر إنهم لو قدروا يبقوا أخوات وأصدقاء باحترام يبقى ده أفضل من إنهم يتحولوا إلى خصمين بسبب حب كان في يوم من الأيام أجمل شيء في حياتهم
وأحيانا الإنسان لا يحتاج إلى نهاية مليئة بالصراخ حتى يعرف أن الطريق انتهى يكفي أن يرى الحقيقة بوضوح ويقبلها ويختار السلام ويقول لمن كان يوما حبيبه خلينا أخوات وأصدقاء بدل ما نكون شخصين كانوا بيحبوا بعض وبقوا بيكرهوا بعض
لأن بعض النهايات رغم وجعها تكون أرحم من الاستمرار في علاقة تجعل الإنسان يعيش خلف غمامة لا يعرف متى تنكشف
الحب الحقيقي مش بس إنك تحب شخصا لكنه كمان إنك تحترم نفسك وتحترم الحقيقة وتعرف إمتى تتمسك وإمتى تسيب وإمتى تقول كان بينا شيء جميل لكن خلاص خلينا نحافظ على الجميل بدل ما نخليه يتحول إلى وجع لا ينتهي
ليست هناك تعليقات:
إرسال تعليق